![GSH APP](https://gazetashqiptare.al/wp-content/uploads/2022/04/gshok.jpg)
![Download on Apple Store](https://balkanweb.com/wp-content/uploads/2019/01/ios.jpg)
![Get it on Google Play](https://gazetashqiptare.al/wp-content/uploads/2022/04/android-app.png)
Një ngjarje makabre, e denjë për filma thriller është regjistruar mbrëmjen e djeshme në qytezën e vogël greke, Andravida, ku një çift shqiptar dhe dy fëmijët e tyre, 2 dhe 3 vjeç, u gjetën të vdekur në banesën e tyre, nga djali i madh i familjes, vetëm 12 vjeç.
Mediat greke raportojnë se, nga hetimet paraprake të policisë, skenari i një vrasje nga babai i 3 pjesëtarëve të familjes, dhe më pas vetëvrasje, është hedhur poshtë.
Sipas policisë, trupat e shqiptarit nga Lushnja, Armando dhe gruas së tij Maria, u gjetën në një rimorkio në depon e shtëpisë, ndërsa në trup kishin plagë të shkaktuara nga armë zjarri, ndërkohë që, arma e zjarrit me të cilën është kryer krimi i rëndë, ende nuk është gjetur.
Po ashtu bëhet e ditur se fëmija 3-vjeçar është gjetur i pajetë në dyshemenë e magazinës, ngjitur me rimorkion dhe 2-vjeçari u gjet i vdekur brenda në banesë.
Si tentoi autori të zhdukte gjurmët e krimit:
Media greke, duke iu referuar grupit hetimor, shkruajnë se autori mesa duket ka pasur për qëllim zhdukjen e trupave, por nuk ka arritur të përfundojë planin e tij pasi duket se diçka e ka trembur dhe ka ikur, ndoshta edhe hyrja në banesë e 12-vjeçarit.
Në brendësi të shtëpisë janë gjetur edhe njolla gjaku të shpërndara, ndërkohë që për krimin e rëndë fajësohet ish-bashkëshorti i Marias, i cili është shpallur në kërkim. Ndërkohë, në fshat raportohet se autor mund të jetë një person tjetër, që ka pasur konflikte me çiftin.
Djali 12-vjeçar me vëllain e vogël në krah kërkonte ndihmë:
Dramatike ishte dhe fakti kur 12-vjeçari hyri në banesë dhe pa prindërit dhe dy vëllezërit e pajetë. Sipas dëshmive, ai u pa me vëllain e vogël në krah, teksa ecte jashtë banesës dhe kërkonte ndihmë i dëshpëruar. Kalimtarët, të tmerruar nga skena njoftuan menjëherë ambulancën dhe policinë.
Një autoambulancë transportoi foshnjën fatkeqe në Qendrën Shëndetësore Gastouni, por fatkeqësisht ai kishte humbur jetën. Do të jetë dëshmia e 12-vjeçarit ajo që do iu jap përgjigje shumë pyetjeve për marrëdhëniet familjare dhe ato me ish-bashkëshortin e Marias (babai biologjik i 12-vjeçarit).
Ish-bashkëshorti i 28-vjeçares, i dyshuari kryesor për vrasjen:
Ish-bashkëshorti i 28-vjeçares shqiptare është i dyshuari kryesor për vrasjen makabre të katër anëtarëve të familjes shqiptare që u shënua ditën e djeshme në zonën e Andaviadës në Ilia, Greqi.
Sipas vlerësimeve të para, oficerët e policisë kanë qëndruar gjatë gjithë natës në vendin e krimit për të mbledhur të dhëna.
Skenarin fillestar sipas të cilit babai ka dashur t’i marrë jetën nënës dhe dy fëmijëve të tyre, 3 dhe 2 vjeç dhe më pas ka kryer vetëvrasje, duket se është përmbysur pasi tashmë policia greke thotë se i dyshuari kryesor i vrasjes tragjike është ish-bashkëshorti i shqiptares, i cili është shpallur në kërkim nga autoritet greke.
Gjithnjë sipas mediave helene, zonat e Ilia, Akaia dhe Atiki, janë duke krehur vendin e krimit dhe zonën përreth për të gjetur prova që do t’i çojnë në hetimin e vrasjes së katërfishtë, por deri më tani nuk ka asnjë informacion në lidhje me vendndodhjen e tij.